Tysnes Gjev Meirsmak - Gjennomføring av First Lego League 2025
Laurdag 8. november i Tysneshallen og på Tysnes skule
Årets First Lego League-turnering samla rundt 200 barn og unge frå 5.–10. klasse, i tillegg til minst like mange vaksne – lærarar, foreldre og besøkande. Deltakarane kom frå Tysnes, Bjørnafjorden, Kvam, Samnanger og Bømlo, og bidrog til ein heildagsfest for teknologi, forsking og skaparglede.
Stemninga i Tysneshallen var elektrisk frå start til slutt – «hallen kokte», som fleire sa. Sjølv med færre lag enn i fjor (12 mot 20), var engasjementet og publikumsoppslutninga minst like stor. Dagen baud på spenning, meistring, stoltheit og mykje læring. Mange elevar fortalde at dei hadde fått nye vener og opplevd korleis samarbeid og problemløysing kan vere både gøy og lærerikt.
Gjennom åtte veker førebuing har laga arbeidd med forskingsprosjekt, teknologi og programmering. Under finaledagen fekk dei presentere arbeidet sitt for dommarar og publikum, og konkurrere i robotkampar med eigendesigna og programmerte LEGO robotar. Målet om å styrkje realfagsinteressa og fremje samarbeid, kreativitet og berekraftige løysingar vart verkeleg oppfylt.
Årets arrangement vart for tredje gong arrangert av Kulturkontoret AS, i tett samarbeid med Tysnes skule og eit stort lag av frivillige. Skulen bidrog med både lokale, utstyr og lærarkrefter, og samarbeidet fungerte sømløst frå planlegging til gjennomføring. Frivillige frå lokalmiljøet stilte opp som (bane)dommarar, teknisk mannskap, kioskpersonell og trafikkdirigentar og riggere. Tilsaman deltok over 30 frivillige, i tillegg til alle som baka til kiosken og føresatte som var med i publikum, og innsatsen deira var avgjerande for at dagen vart så vellukka.
I pausen under arrangementet fekk vi òg oppleve eit sprudlande musikalsk innslag med Dissimilis-bandet “The Jokers” frå Bømlo – som fekk både barn og vaksne til å danse og 1 synge med. Ein festleg og inkluderande pause som løfta stemninga endå eit hakk før finalerundane.
Finalerundane vart eit verkeleg høgdepunkt, både for deltakarar og publikum. Då dei to laga frå Samnanger møttest i semifinalen, byrja resten av elevane frå Samnanger å synge Samnangersongen frå tribunen – og stemninga i hallen nådde eit nytt nivå. Jubel, song og applaus fylte rommet medan robotane køyrde dei siste oppdraga på borda.
Til slutt var det laget “Sea Diggers” frå Samnanger barneskule som gjekk heilt til topps og vann Championprisen. Etter turneringa fekk Kulturkontoret AS avklart at vi kan sende to lag til den skandinaviske finalen, og dermed får også “The Preppies” frå Tysnes skule delta – for andre gong! Det er svært gledelig, og eit bevis på det høge nivået og engasjementet blant dei lokale laga.
Takk til våre støttespelarar
Utan støtte frå lokalt næringsliv, kommune og frivillige hadde ikkje First Lego League vore mogleg.
Vi vil rette ein stor takk til:
• Tysnes Kraftlag – for å vere ein viktig drivkraft for lokalsamfunnsutvikling og ungdomsprosjekt
• Tysnes kommune – for lån av lokale og støtte til gjennomføringa • Enivest – for engasjement og framtidsretta satsing
• Tekna Sunnhordland – for å dekke alle Challenge-sett og løfte fram realfag blant unge
• Lerøy, Sparebanken Norge, Andersland Bygg, Vågen AS, Aker Solutions, Mandelhuset, Jippie, og Propyro – for praktisk og økonomisk støtte som gjer arrangementet mogleg
Tusen takk til alle som bidrog – kvar og ein har vore avgjerande for at dagen vart ein stor suksess.
Vi gler oss allereie til First Lego League 2026!
