Tysnes gjev meirsmak - Produktutvikling i reiselivet
RAPPORT FRÅ TYSNES GJEV MEIRSMAK (TGM)
«Fase 3»
Tysnes næringsråd tok i 2020 eit initiativ til eit «omdømmeprosjekt/destinasjonsprosjekt» for å auka attraktivitet og omdømme med spesiell fokus på Tysnes som reisemål.
Hovudmålet for prosjektet er å få auka synlegheit, næringsaktivitet og verdiskaping på Tysnes med nærturistar og hyttegjester som målgruppe.
Prosjektet har vore inndelt i tre fasar:
Fase 1: Identitet og kjerneforteljing - FERDIG
Fase 2: Grafisk design, kommunikasjon og marknadsføring - FERDIG
Fase 3: Produktutvikling og samarbeid
Mette Fagerli, som var prosessleiar i Fase 1 og 2, vart hyra inn til også å gjennomføre Fase 3. At ho kjente både prosjektet og aktørane frå før, gjorde det lettare å komme raskt i gang med konkret arbeid på samlingane.
Det har vore to samlingar på Kompasset: 31. januar og 21. februar 2023. Til første samling var det 12 påmeldte frå ulike bedrifter innan lokalmat og reiseliv, medan det på andre samling var 11 til stades. Det vart gjeve ein innføring i korleis ein utviklar tilbod til turistar og korleis ein sel og marknadsfører desse.
På samling 1 jobba vi også med produktutvikling for den einskilde bedrift. I vekene etter første samling vart det gjennomført individuelle møter med dei bedriftene som ønskte personleg rådgjeving, anten fysisk eller på Teams. Prosessleiar laga så eit riss til ei oppleving, som bedrifta jobba vidare med og presenterte på samlinga 21. februar.
Arbeidet med å utvikle konkrete salbare produkt fram mot sommarsesongen 2023 er godt i gang, utan at TGM kan gå nærare inn på den enkelte bedrift sine planar.
Det er tenkt at opplevingane marknadsførast på den enkelte bedrifts heimesider, men at det vil bli lagt ut lenkjer til desse på TGM sine plattformar, slik at det finnes ein felles paraply for desse aktivitetane..
Ein ser óg for seg eit konsept, som vi så langt har kalla «Tysneshelg», der fleire aktørar tilbyr arrangement i spesifikke helgar i løpet av sommaren. Tysneshelg vil også bli marknadsført på TGM sine plattformar..
Fram mot sommaren skal det jobbast med å vidareutvikle opplevingane og marknadsføra og selja desse.
I tillegg til dei heilt konkrete resultata i form av produktutvikling, var det stor semje om at det å vere saman i to dagar og blir betre kjent med kvarandre og kvarandre sine bedrifter, gjer at det blir vesentleg lettare å samarbeide om konkrete prosjekt i framtida.
