Meirbruk AS - Start av gjenbruksbutikk i Våge

I slutten av november fekk vi innvilga støtte frå Tysnes kraftlag til opning av gjenbruksbutikken Meirbruk. Etter det har vi jobba så raskt som mogleg med å få på plass gjenbruksbutikken i Våge. Støtta frå Kraftlaget var den utløysande faktoren, som gjorde at vi tok sjansen på å gå i gang med prosjektet.

Blikk design AS vart hyra inn for design av logo og heimeside, og domenet www.meirbruk.no vart kjøpt. I desember jobba vi med kassasystem, lokalar, start av aksjeselskap, brukthandelbevilling, låssystem, sikkerheit, rekneskapssystem og innreiingsløysingar.

Val av leverandør av kassasystem falt på danske Loppesalg.dk, som tilbyr eit system for administrasjon av mange seljarar i same butikk. Systemet er brukt av andre liknande butikkar i Noreg.

DØRLÅS

Dørlås og identifikasjon av kundar var det som var det vanskelegaste i planleggingsfasen. Det finnes ikkje noko godt system på marknaden for autentisering av personar som skal ha tilgang til ei lita, sjølvbetjent butikk. Det finnes nokre løysingar for større butikkar, men dei er dyre både i innkjøp og drift.

Løysinga for oss var å opprette ei SMS-teneste med kodeord. Kundane sender kodeordet til eit nummer og får dørkoda tilbake. Koda vil bli skifta fleire gonger i veka, slik at dei som vil inn, får ny kode kvar gong. I tillegg er det videoovervaking av lokala.

INNFLYTTING

Meirbruk flytta inn i lokala i Svingen Puls i midten av januar, og frå då var hovudfokus å få lokala i orden til opning. Hyllesystem vart kjøpt inn og montert, saman med overvakingskamera, ekstra lys og alle delane til kassen.

Vi starta marknadsføring på Facebook i starten av februar, og averterte opningstilbod med gratis hylleleige for opningsveka. Det gjorde at alle hyller var utleidd til opninga.

23. februar samla alle seljarane seg i butikken og gjorde klar sin hylleseksjon og 24. februar var det opning av butikken.

Butikken har vore godt besøkt den første veka, med alle hyller utleidd og godt sal for dei aller fleste.

ØKONOMI

I kalkylen anslo vi oppstartskostnadane til å vere kr. 130 000,-, inkludert kr. 30 000,- i eigeninnsats. Vi har heldt oss godt innanfor budsjettramma når det gjeld kostnadar, men eigeninnsatsen har vore betydeleg høgare enn berekna.

VIDARE ARBEID

For å få butikken til å bere seg, er fokus framover på sal og marknadsføring.

Det er laga ei heimeside der ein kan booke seg hylle og leggje inn varene ein har for sal. I tillegg bruker vi Facebook til å informere om varer og anna som gjeld butikken og vi har laga ei eiga gruppe for dei som har varer i butikken der dei kan promotere sine varer.

Å få folk til å handle i butikken er det som er viktigast for at prosjektet skal vere levedyktig. Det er ikkje problem å få folk som vil selje kleda sine i butikken. Men for at dei skal sjå nytta av å bruke vår salskanal framfor Finn eller Facebook, må dei faktisk selja for meir enn hylleleiga kvar veke.

Vi er optimistiske av natur og har tro på at vi skal få dette til!

Synnøve Bakke 08.03.23